ئەمینداری یەكگرتوو داوای لە سێدارەدانی بكوژانی مامۆستا هۆشیار دەكات

کراوەیی ئیسلامی

Alternate Text

میللەت
ئەمینداری یەكگرتووی ئیسلامی داوای جێبەجێكردنی بڕیاری دادگا لەسەر بكوژانی مامۆستا هۆشیار دەكات كە پێنج ساڵ لەمەوبەر لە بەردەم ماڵەكەیدا لە هەولێر كوژرا.


سەڵاحەدین بەهادین ئەمینداری گشتی یەكگرتووی ئیسلامی كوردستان پەیامێكی بڵاوكردەوە و تێیدا هاتووە: ئەمڕۆ " 22ی 11یە و ساڵی پێنجەمی تێرۆری مامۆستا هۆشیار و شەهیدەكەی هەولێرە".

ئەمینداری یەكگرتوو نووسیوێتی: "یادی د.هۆشیارە، ئەگەرچی ‌ناو و یادی هەردەم ئامادەی دڵەكانە، بەڵام من و یەكگرتوو،مناڵە نازدارەكانی و هاوسەر و كەسوكارە بەڕێزەكەی و دۆستانی بەتێكڕا دەپرسن: ئەرێ كوا سزای یاسایی ئەو تاوانە گەورەیە؟! كوابەڵێنەكانی بەرپرسان؟! كوا؟!!".

شەوی 22-11-2016  مامۆستا هۆشیار ئیسماعیل پێشنوێژ ‌و وتارخوێنی مزگەوتی حاجی عومەر بندیان لەبەردەم ماڵەكەی خۆیدا لە هەولێر كوژرا و پاشان دوو كەس بە تۆمەتی ئەنجامدانی تاوانەكە دەستگیركران.

ڕۆژی 4ی ئایاری 2017ش دادگای هەولێر سزای لە سێدارەدانی بۆ بكوژرانی مامۆستا هۆشیار دەركرد، بەڵام تا ئێستا جێبەجێ نەكراوە.